政府噚日公佈高鐵香港段一地兩檢方案，令人諗起8年前政府為高鐵強硬收回石崗菜園村，村民誓死護村一事，當年成功協助村民覓地搬村嘅鄉議局前主席劉皇發日前逝世，菜園村村民高春香至今感激發叔當年幫忙，話如果冇發叔居中斡旋，村民難覓地遷村。
高春香話發叔確實好有心幫新界人，亦有心保護新界傳統：「發叔想鄉議局能顧及原居民同非原居民嘅利益，同埋保留鄉下人嘅濃厚人情味」。佢又話發叔認為港英政府對新界人嘅懷柔政策值得特區政府學習，「將一啲事同地區嘅人，通過具體溝通盡量處理，而唔係硬板咁斬開幾嚿」，佢希望林鄭班子投放更多資源推動新界城鄉規劃發展，推動城鄉和諧。