前財爺曾俊華特首選戰戰敗後，生活依舊十分忙碌，好似噚日就連走幾場活動，主要係出席慈善項目、社企推廣等，8月尾將為黑暗中對話（香港）基金會主辦嘅《暗中作樂2017》聲演會擔任特別嘉賓，大開金口演唱《Wandering Chinaman》。薯片叔喺電台節目話呢首歌係關於曾祖父輩嘅美國華僑辛酸史，到咗佢呢個年紀唱，感覺更深，指活動可令香港更了解視障人士需要，推進共融。
讚林鄭開局好
薯片叔笑言，市民對佢仍然好熱情，出席活動都會提前出門，因為街上仲有唔少人要求合照。講到社會流動同青年人問題，佢認為流動係必須嘅，年輕人成日話「向上流動」，「世上有地心吸力，我哋了解係向上爬，係艱辛，要付出努力」，又話買樓唔應該係人生第一目標。
問及林鄭月娥嘅新政府，佢話開局好好，未見到有乜事會加劇撕裂，至於點樣爭取市民信任就要觀察，大家要畀多啲時間林鄭。曾經話特首係一份「衰工」嘅薯片叔並指，政策傳統上由大眾出發，其實係一個減少嘅過程，相反政策若能分析唔同小眾嘅需要，就係一個加嘅過程，集腋成裘。
其間主持人叫佢總結官場生涯，佢笑指冇諗過，唔會掉頭睇係咪做得不足；至於為官態度，佢話要坦誠，為整體利益而非個人利益去做，又指管理層要識得下放權力，好似佢做財爺時辦公室得3個職員，3個人智慧加起嚟一定比佢諗得周全，所以大多接納佢哋嘅意見，強調要信任及知道下屬嘅強處。
