據博士C講，現時中國知識分子好有體制自信，甚至有個別例子表現出大企業排擠海歸派嘅現象，認為本土名牌大學生嘅水平，特別係在體制忠誠方面，勝於海外名牌大學留學生。英國有民選文翠珊，搞到國家不和，與歐盟分裂；美國有個特朗普，狂人一名，上任至今一事無成；韓國有朴槿惠，任內胡為；日本有安倍晉三，民望低落，岌岌可危。咁多所謂民主選舉政府，選出來嘅國家領導人都係唔掂嘅，遠不及祖國習主席英明決斷，有理論思想帶領祖國人民前進。
博士C問左丁山：「民主選舉有咁多弊端，香港有好多有錢商家，上咗位嘅專業人士都認為要經濟發展，不要民主選舉搞亂檔，你認為如何？」左丁山只想引用邱吉爾一句名言回答：「Indeed it has been said that Democracy is the worst form of government, except for all those other forms that have been tried from time to time」（11/11/1947）
博士C笑曰：「或者邱吉爾所謂之all those other forms未有包括鄧小平推動嘅中國特色社會主義，1947年之時，冇人諗得到。」
講理論就有排拗嘞，講實際行動好啲。中國人民富起來之後，如真係如蛋頭知識分子咁有「體制自信」，何解有辦法的，總是爭相移民美加澳紐，甚至來香港攞身份證？CNN一篇報導講（7月17日），一間移民顧問公司（Visas Consulting Group）及「胡潤報告」嘅研究發現，身家在一千萬至二億人民幣嘅中國人（未算大富豪級，但更有代表性），最鍾意移民去美國，三藩市、西雅圖、洛杉磯、紐約係四大中國人最喜歡移居嘅城市，因為佢地認為美國生活方式幾好喎。
在中國搵到錢或者發大達，何解仲要移民去高稅率、多規條嘅美國？中國人在美國做生意，由初創企業開始，有幾多人可以搵到三億元人民幣身家吖？講到最真嗰句，中國人民富起來之後，就對保護私有產權，尊重個人自由之民主選舉體制更加重視更加擁護，有咗錢，就怕一下子跌落雙規陷阱，受「後台落馬」所連累，個人如此，大型民企又係借頭借路去走資，出國併購海外公司，投資為名，走資為實，正是走得快好世界！萬達夠威嘞啩，走資遲少少，現在就要被國家監管機構調查處罰，波及融創，另外其他公司收購英國球會，意甲球會亦係冇乜財政邏輯嘅，分分鐘係企業移民，又係對中國體制無信心嘅例子。