唱片騎師（DJ）出身嘅鄭子誠最為人熟悉嘅除咗佢把靚聲之外，就梗係佢個奸樣，就算飾演忠角甚至只係配旁白，都會被網民懷疑一定有陰謀。而一切，都要從1995年開始播映嘅長篇電視劇《真情》開始。
《真情》 － 李子浩
鄭子誠第一套演出嘅電視劇就係《真情》，而劇中飾演李子浩嘅佢就因為夠奸夠賤而聲名大噪，不過原來李子浩本身唔係奸人，鄭子誠係一次訪問就話過：「做咗一輪監製話我做好人點都唔夠阿海黃智賢好，仲話發覺我眉宇間帶點奸意，係第一次有人咁講，o依家諗番轉頭要多謝監製獨具慧眼，角色由力爭上游變成不擇手段。」
《烈火雄心》 － 劉海逸
喺劇中係古天樂大哥嘅佢（養子），因為迷戀古天樂未婚妻梁琤而強姦對方，更間接害死梁琤，作為第三部參與嘅電視劇，鄭子誠奸得夠晒出位，更加確立咗佢奸角嘅定位。
《封神榜》 － 紂王
一臉嘅絡腮鬍令鄭子誠化身為史上最出名嘅暴君之一，烽火戲諸侯、酒池肉林等畫面，再配上放蕩嘅大笑令歷史再次重視係觀眾眼前，一句「美人啊～」到今時今日仍言猶在耳。
《畢打自己人》 － 周政名
處境喜劇中夠晒貼地嘅情況令唔少觀眾投入感更強，而《畢打自己人》可以話係近年較多人睇嘅處境劇之一，鄭子誠飾演嘅周政名就有如各大打工仔喺辦公室見到嘅冇八成都有七成相似，令人恨之入骨。
《非常平等任務 － 按摩有罪》
鄭子誠出色嘅演技及奸險形象唔只香港人認同，佢喺香港電台有份參與拍攝嘅《非常平等任務 － 按摩有罪》就奪得美國曙光獎金獎，戲中佢飾演一名企圖性侵印尼籍女傭嘅無良僱主，入型入格，奸角定位更獲得國際認同。