台灣女歌手王心凌同台灣男演員姚元浩喺今年2月被揭結束4年情，噚日有台灣《蘋果》讀者爆料，一個叫「靠北女友」嘅facebook專頁，出現咗張王心凌着住桃紅底褲，身穿白色小背心，手遮面嘅瞓覺相，而王心凌經理人張嘉容就承認呢張咁私隱嘅相係姚元浩影嘅，但當時王心凌係唔知被人影咗相，嗰時佢哋拍緊拖好甜蜜，姚元浩覺得女友瞓覺個樣好可愛，所以就影低咗。其實一兩年前已發現張相流出，當時質問姚元浩，姚元浩坦承張相係佢影，仲話唔知點解外洩。
發聲明擬提告
王心凌所屬經理人公司噚日發出正式聲明：「那是心凌在家賴床午睡的照片，流傳這個照片已經涉及妨害秘密，嚴重侵害藝人私隱，已與律師研究，針對拍攝及散佈者提出民、刑事法律訴訟。」
姚元浩就透過經理人回應：「發誓，不是我散發出去的。我真的不知道為甚麼照片會流出去，當時（上次流出）有跟她道歉。」姚元浩經理人話會同律師討論，循法律途徑追查係邊個流出張相。
至於係咪呢件事導致與心凌分手，姚元浩就冇回應。而讀者爆料所講嘅fb專頁，圖文已被刪，不過搜尋網絡仲見到有段片流傳。另外，王心凌所屬天晴音樂亦發出聲明，指出流傳相片已涉及妨礙秘密，嚴重侵害藝人隱私，已經同律師研究，會針對拍攝同散佈者提出法律訴訟。
其實呢次並唔係王心凌第一次有私密照被放上網，00年開始與王心凌拍拖5年嘅范植偉，10年喺facebook上載咗一張赤裸上身、擁抱住王心凌嘅自拍照，甚至聲言：「我原本以為她17歲，第一次是給我，但不是的。」又承認對舊愛動粗，語出驚人。
撰文：馮仁昭