書展收爐前，環境局局長黃錦星把握最後機會行咗一轉，亦同青協嘅青年人傾咗一陣偈，分享平時行山嘅所見所聞，自爆驚險一幕，好彩有驚無險。
真人版「大嘥鬼」身為環境局局長，年輕人當然問佢有乜行山地方推介？佢介紹位於地質公園嘅荔枝窩，大讚嗰度有幾百年嘅客家村，又結合環境生態，絕對值得一去。跟住有年輕人問佢有冇試過俾動物嚇親？佢話行山時遇過一家大細嘅野豬、黃麖，雖然未至被嚇親，但行行吓突然遇到都會打個突嘅，而最驚險嗰次就見遇到兩條俗稱「飯鏟頭」嘅中華眼鏡蛇，即係毒蛇，好彩當時兩條蛇喺度打緊交，唔得閒理大嘥鬼。黃錦星唔係空手而回，喺青協攤檔買咗3本書，仲參觀咗環保署攤位支持同事，仲同迷你版大嘥鬼相遇㖭（圖）。