周日環法單車賽完成最後一站賽事，Team Sky嘅英國車手科美毫無懸念咁保住黃色戰衣，順利成就三連霸，贏得車手總冠軍，亦係佢職業生涯第四次贏得環法。不過，賽事最驚喜嘅地方，係科美喺賽後幫一個叫卡華利嘅車迷求婚成功！
科美雖然喺環法最後一站嘅第21站頭10不入，但仍喺主車群中衝線，成功保住黃色戰衣，總成績累積86小時20分55秒，保持領先第二位嘅烏倫多達54秒嘅優勢，成功奪冠，賽後佢立即抱住個仔同老婆一齊分享喜悅。不過好戲在後頭，喺科美勝出後，佢同車迷卡華利一齊走到卡華利嘅女友艾美身邊，之後仲攞出鑽戒，等卡華利向艾美求婚（小圖）。咁有心思嘅求婚，就梗係成功啦！另外，法國車手古迪亞亦喺比賽直播期間，對住攝影機向女友嘉露蓮求婚，據講亦都成功咗，呢站真係sweet到震！