今夏好似企咗喺人生十字路口咁嘅巴塞隆拿前鋒尼馬，受分手同埋轉會兩項重大新聞纏繞，天價去巴黎聖日耳門（PSG）單嘢唔知堅定流，早前又同女友布魯娜二度分手。不過似乎兩件事都有突破性發展，巴塞後衞碧基周日喺社交網站上載佢同尼馬嘅合照，仲用西班牙文寫住「Se queda」，英文意思即係「He stays」！同時，尼馬亦似乎同細佢一歲嘅美國青春女歌手迪美（Demi Lovato）撻着！
碧基po相：佢會留低
25歲嘅尼馬離隊嘅消息呢排傳到好勁，有報道甚至話佢已經同PSG傾掂條件，只係差簽約箒咁喎，甚至乎吹到話美斯喺ig刪晒同尼馬嘅合照，不過俾眼利嘅球迷發覺，其實只係美斯不嬲都好少擺尼馬嘅相箒。而且碧基喺twitter同ig都post佢同尼馬嘅合照，仲寫住話「Se queda」，向大家派定心丸話尼馬會留喺巴塞，咁究竟尼馬係走定唔走呢？大家都係再睇吓先啦！
感情方面，西班牙傳媒話尼馬已經喺網上同美國女歌手迪美曖昧緊，早前尼馬出咗招幾特別嘅，就係喺車上自拍一路揸車一路唱迪美首新歌嘅短片，放上網後仲寫住話「迪美，我鍾意你呢首新歌－－尼馬」。呢種隔空傳情方式，可見尼馬真係幾高招，而且佢亦都like咗對方最近嘅自拍post。
自拍唱歌短片隔空傳情
至於上周六喺新澤西對祖雲達斯場國冠盃，尼馬梅開二度，如有神助咁，原來迪美亦係座上客，仲着埋巴塞件波衫，有傳賽後仲同尼馬去咗蒲吧，但就冇圖唔知有冇真相嘞。不過，佢有個叫Gabi嘅攝影師朋友，上周六同佢一齊入場睇波，就喺twitter暗爆迪美同尼馬真係有路咁，講笑咁話迪美着錯波衫，因為佢應該着PSG件波衫先啱。