「我個人同品牌重要，我嘅背景同身份唔係最重要！」澳門前特首何厚鏵的女兒何芓諄（Charmaine）去年受訪時強調創立手袋品牌me char，一直靠個人打拼。今年由專攻遊客的尖沙嘴，搬回做本地客的銅鑼灣，面對過客戶拖數、壞data死機等小資本生意常見事，她樂觀繼續做，「我哋呢啲細公司，乜都一腳踢，不過又有好多嘢學到。」
採訪：林妙萍
攝影：郭賢興
澳門前特首何厚鏵的千金何芓諄，7年前於紐約創立自家手袋品牌me char，簡約時尚風的手袋走三、四千元的中價路線，以60、70年代紐約風尚作靈感。
Charmaine大學讀傳理系，在紐約MTV台做過PA、打過時裝工，不想從政的她，醉心設計，專注自己的手袋生意。別以為名人子女的路易行，Charmaine不靠父蔭，一般小本創業者經歷的困難，她同樣要獨力面對，「之前2月，好不幸網站受到病毒入侵，變咗data死咗，不過好消息係我哋客戶資料冇問題，又趁機將server由美國搬返香港。」
「乜都一腳踢」
危中有機，Charmaine最初在紐約創業，伺服器在美國，不時遇到內地客因防火牆而上不到網購物，現時搬返香港，正好可以開拓內地市場。「解決呢類問題真係佔咗我一半時間，但我哋細公司，乜都一腳踢，嘥咗好多精力喺我哋唔擅長嘅地方，一對手要做五個人、十個人嘅嘢。我梗係想放多啲時間喺設計上，設計係我最擅長，要搵商場舖位、請人呀，有時我又要做埋HR、PR，搞website，真係好多心力。」
做運動平衡
一個人打拼的日子辛苦但多樂趣，me char去年底由主攻遊客的尖沙嘴，搬到做本地客的銅鑼灣，除了在amazon、Goxip電商賣手袋，Charmaine亦開拓一千元以下、走簡約易襯的耳環和戒指等配飾，人流生意大為進步，「做咗七、八年，不論係待人接物，人事、商業交流，都多咗好多機會學。」品牌亦吸引投資者招手，但她未決定，「搵合適拍檔最了解，品牌其中一個最重要嘅資產就係我。」
Charmaine要香港、澳門、美國三邊走，講求work life balance，平日愛游水、行山，「每個星期會keep住畀自己有兩日時間做運動，運動係令人冇咁大壓力！」
超蓮甘比力撐
Charmaine多明星名人朋友，陳凱韻（甘比）、何超蓮，甚至徐子淇等都不時為她甫新手袋，更會畀錢買，何超蓮最近就甫了新系列Lip的手袋，Charmaine說：「我嘅靈感係由心出發，好似love yourself咁，我覺得嘴唇亦係表達自己感受、想法的靈魂之窗，所以加入設計中。」
2017系列，亦有輕身休閒的牛仔布背包、時裝感強的迷彩safari pattern及tweed bag等。
更多精采時尚內容，盡在 http://add.appledaily.com 。