首個大型《Pokemon Go》捉精靈活動「Pokemon Go Fest」已在美國時間7月22日芝加哥舉行，雖然據稱活動期間因WiFi熱點無法正常運作，而令20,000名精靈訓練員靠手機網絡進行遊戲，官方已承諾退還參加費、加送100美元遊戲代幣及得到神獸利基亞（路奇亞）；但兩大神獸利基亞同急凍鳥都在活動後隨即在全球「團體戰」登場，相信唔少精靈訓練員已同這兩大神獸交手。兩隻神獸CP值都甚高，急凍鳥達37,603CP，利基亞更達42,753CP，基本上最少要合13、14人之力先有機會打敗神獸，若唔夠人的話記得先退出戰鬥等齊人才開局，不過就算打贏之後要捉神獸亦非常困難。記者綜合試打幾場的經驗，20人合力打贏神獸後通常都只是得三至四人成功捉到，除了不斷餵神獸食金色蔓莓果外，還要掟出「Great」或「Excellent」精靈球先有機會捉得到神獸，不過最終都係要睇彩數。
要打「團體戰」需要用入場券，每日靠轉道館得一張免費券肯定唔夠用，推介用480代幣購買附有6張入場券及10個鳳梨果的特別禮盒，純以打大佬計會抵買過高級禮盒（980代幣）及超級禮盒（1,480代幣）。入場券有限下，打利基亞抑或急凍鳥先？有傳利基亞只限時開放48小時，即是話只到香港時間7月25日上午8時左右，雖然Niantic官方並無證實有關傳聞，不過最好都係先打利基亞。除了利基亞同急凍鳥，官方表示另兩款神獸雷鳥（閃電鳥）及火鳥（火焰鳥）都會好快登場，除課金外，記得趁這段時間多霸佔道館賺代幣。各位精靈訓練員要留意，神獸只可用來打道館，並不能守道館，記者試過用急凍鳥打道館都確實幾好用。
資料來源：Niantic
記者：布偉倫
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily