世界游泳錦標賽嘅游泳項目喺周日展開，就立即有重量級大戰，中國泳手孫楊喺男子400米自由泳決賽力壓澳洲勁敵賀頓奪金，創下呢個項目世錦賽三連冠偉業。
由於孫楊喺舊年里奧男子400自意外輸畀賀頓，事後賀頓寸孫楊服食禁藥係「作弊的人」，所以今次世錦賽再碰頭，被視為孫楊復仇之戰，結果周日呢場男子400米自決賽，孫楊以3分41秒38順利贏出，取得世錦賽三連冠，賀頓以3分43秒85得亞軍，季軍為里奧銅牌得主意大利嘅迪堤，時間是3分43秒93，至於南韓嘅前奧運冠軍朴泰桓就得第四。喺頒獎儀式結束後，孫楊亦主動同賀頓握手。孫楊喺賽後顯得相當激動，眼泛淚光表示：「我就係想爭口氣！呢半年嚟實在係太辛苦嘞，絲毫冇放鬆，就係想喺今次比賽去證明自己，所以一直堅持按照教練嘅計劃加強訓練。」
何詩蓓今戰200自
另外，瑞典雖然喺女子4x100米自由泳接力賽僅得第五名，不過負責第一棒嘅絲祖唐突破52秒大關，游出51秒71嘅女子100米自由泳新世界紀錄。
至於日前表示會喺世錦賽後退役嘅本港背泳好手劉彥恩，就喺女子100米背泳嘅初賽游出1分02秒23得第31名，無緣晉身準決賽。
至於今日港將焦點，就一定係啱啱打破咗女子100米自香港紀錄嘅何詩蓓，將會鬥女子200米自初賽。（無綫體育台今日3:30pm直播）
