眾所周知，名人愛買磚頭，三日唔埋兩日就聽到有名人買樓，不過，人稱「伍姑娘」嘅伍詠薇就講到明，今年未有打算喺香港置業，佢慨嘆，香港樓價根本追唔上，好似「追巴士咁樣」。
伍姑娘噚日出席一個工廈展銷廳開幕活動，佢話係「捧朋友場」，同發展商係好朋友。不過，一講起樓價，伍姑娘就好慨嘆，話香港大多數市民嘅收入都追唔上樓價，好似「追巴士咁樣」，「可能細單位都仲affordable」，但要追求大牌子或者大單位，就要更加努力先得。
問到有冇興趣入市，佢就話自己海外有物業，但點都唔肯講喺邊樹，開玩笑咁話「喺非洲買」！睇番資料，伍姑娘上年都有拍住一代填詞人林敏聰，幫領展（823）推廣「泊食易」App，似乎同本地工商物業都幾有淵源。