除咗幻彩詠香江同夜景，其實維港呢個香港地標，仲可以呈現充滿童真嘅另一面。海港城即將舉辦Bubble Up快閃藝術表演，請咗擅長裝置藝術嘅日本當代藝術家大卷伸嗣喺維港旁上演「千萬泡泡詠香江」，將大家夢幻嘅童年回憶，化成千千萬萬個泡泡，配維港靚景，等市民泡得喜。
Bubble Up會喺8月2號至20號，逢周五、六、日下午喺海港城海運大廈露天廣場舉行，每場表演約15至20分鐘；唔單止可以睇，仲可以幫手搞到一鑊泡，因為Bubble Up表演需要一定工作人員從旁協助，所以海港城都公開招募對藝術同日本文化有興趣嘅公共藝術見習生，獲聘者有機會近距離同大卷伸嗣學嘢，完成見習計劃仲有證書！