要數近年嘅政壇女神，青年新政游蕙禎肯定榜上有名，長頭髮眼大大嘅游BB每次登場，總有唔少男fans𠵱嘩鬼叫，八方問游BB中學時係咪同樣咁多粉絲？點知佢搶住話：「冇㗎，以前好薯㗎，讀到中四仲戴住個眼鏡㗎！」從游BB提供嘅一張中四「影後」照，隱約可見佢係四眼妹，另一張清純校服look已經戴咗con，但都唔及趴地影畢業相咁搶鏡！
現年26歲嘅游BB係家中獨女，佢話一直唔多覺孤寂，習慣咗一個人玩兼周圍去，但有時都會諗「點解其他人有兄弟姊妹嘅」。父母當時都係公務員，游BB話屋企管教都幾嚴，娛樂亦有限，「日日都係返學、放學，返屋企、溫書，連電視都唔多畀睇」，結果圖書館成為佢嘅流連地，「唯一娛樂可能就係睇吓書，都唔係鍾唔鍾意嘅問題，係根本冇得揀（其他娛樂），哈哈」。
鍾意睇《鹿鼎記》想讀考古
少女情懷總是詩，佢小時特別鍾意睇小說，不時捧場睇亦舒，「最初都唔太明內容講乜，大嗰啲先了解佢筆下嘅世界」。越大越愛睇金庸，印象最深刻係《鹿鼎記》。唔通鍾意韋小寶呢位風流人物？佢話因為小說情節非典型兼有共鳴，「（韋）呢個角色好common，描寫緊一個可能街頭都會撞到嘅社會小人物，諗嘢快頭腦靈活，身邊實搵到」。
游BB讀伊利沙伯中學，初中成績唔算太標青，「好懶，唔多想背資料」，中六、七時成績好過之前，佢嘅散文創作曾被收錄喺學會作品集。而佢其時去圖書館睇嘅書，亦由小說變為歷史參考書等。
入咗嶺南大學中文系，佢以「好摺」形容當時嘅自己，除咗上一啲興趣班同幫手搞雜誌，唔算太積極參與活動。其實佢畢業後想進修，「想儲幾年錢就去外國讀書」，因為佢想讀嘅考古學香港冇得讀，講到呢度不忘自嘲一番，「輸埋官司就唔使諗啦，就嚟破產嘞，仲去得邊度？」
被DQ嘅游BB早前講過或者參加立法會九西補選，原來佢細個同九西都有淵源，小時住旺角，兒時亦常去住喺黃埔花園嘅舅父屋企玩，「嗰度有個羽毛球場，親戚飯前會去打波，我就成日企喺場中間唔知做緊乜，哈哈」。
李八方