博士C講，中國知識分子時興談論「體制自信」，相信中國現行制度比世界其他制度優越，保證中國可以在21世紀前進前進，成為世界前二名強國、經濟快速增長，收入不斷提高嘅國家，令美國目瞪口呆！
點解咁有自信呢？講制度如何優越，第一講錢，第二講建設，第三講科技進步。講錢：中國有外匯儲備三萬億美元，全球第一，中國GDP總值已係世界第二，僅次於美國，拋離歐盟與日本，中國遊客威震全球，連驕傲法國都跪地歡迎中國遊客，泰國更唔在講，中國企業出外係咁收購著名公司、物業，所向無敵。
講建設：中國高鐵從無到有，技術已超過日本法國，興建高鐵技術成為出口王牌、進軍阿非拉急先鋒，日本法國得個恨字。
講科技：馬雲之阿里巴巴開發之智慧城市，無人超市及電貿系統已成為世界學習典範，只有美國拍得住，但唔夠中國普及，日本歐盟更瞠乎其後。
講軍事：中國已有核子潛艇，航母遼寧號，長征火箭可上太空探測太空、月球，航天技術僅次於美國俄羅斯，核子動力潛艇游弋印度洋，震懾印度。
以上各點，冇人敢否認，中國知識分子認為如此巨大成就發軔於中共一黨專政，政局穩定，冇人敢在議會搞亂檔，勝過英法俄日之民選議會，中國領導夠權威，夠主導，一做十年，有連貫性。
有咁多好嘢，唔怪得中國知識分子開始自我感覺良好，指外國制度有所不足，科技進步緩慢等等。
聽博士C講完以佢所知嘅內地知識分子之新想法──即「體制自信」，如習近平所言，相信黨，相信國家，相信體制，相信自己。講多十次八次，如自我催眠，乜都信，21世紀中國第一！聽完古就要駁古，財務W心水清，第一個發炮：「既然咁有自信，何故內地股市還是消息滿天飛，愛炒消息，國家隊不時入市維穩。中國對自己嘅金融制度唔夠自信噃！」老友Y又質疑既有體制優越感，何以中央唔敢放劉曉波一介平民出外就醫，既然咁優越，那怕劉曉波出國後「惡毒攻擊祖國呀？」老同學C也講到航母潛艇，1930年代日本已有航空母艦大戰太平洋美軍，今日日本如要製造航母唔會買入烏克蘭航母去改裝啫！一人一句，就暴露咗中國在硬件建設方面，大有成就，但軟實力方面，還是滿清時代腦袋，還未得世人尊重。