【本報訊】廣深港高速鐵路香港段預計明年第三季通車，因高鐵被滅村的菜園村村民高春香昨憶述，當年劉皇發就高鐵收地問題向村民游說：「犧牲小我，完成大我」；高鐵一地兩檢安排勢引起更大爭議，高春香對發叔「完成大我」有利整體社會的說法存疑：「對市民有幾多好處？全香港人有幾多可以用到呢？」
質疑高鐵通車好處
當年港府為興建高鐵香港段強拆石崗菜園村，村民其後購入元朗八鄉元崗村和大窩村旁一幅15萬方呎土地建設新村，菜園村村民兼菜園村關注組主席高春香昨稱，發叔當年在高鐵事件上經常向村民說要「犧牲小我，完成大我」，她認為值得反思，「犧牲小我（菜園村）就肯定犧牲咗，都幾慘烈，多年嚟咁多時間同人力嘅虛耗，並非一般人想像到，菜園村大大話話（搬村折騰）8年，𠵱家先叫做住喺間新屋度，當中對人嗰種虛耗係好強大」。
她質疑高鐵通車，是否象徵已「完成大我」，「市民睇吓……開咗高鐵，對市民有幾多福利？對市民有幾多好處？全香港人有幾多可以用到呢？呢啲都係香港人要知道，同埋今日都要高舉西九有個總站嘅經濟效益，喺呢咁多年，除咗不停超支外，經濟效益喺咁多年嚟講，focus係咪真係準呢？」
她續稱，擔心一地兩檢對香港一國兩制的影響，「雖然話有一個地方劃咗畀中央，但對我呢啲小市民係唔安心，因為政治敏感高咗，我認為畀番啲空間香港人，我哋會自在啲，呢嗰地方〈香港〉會發展得好啲，更加對中國尊重同信任」。
談及近況，高春香表示，村民在新菜園村生活剛安頓下來，估計最快要半年至一年後才可復耕。她說原在新菜園村附近有一塊農地暫借村民耕作，但面積非常細小，「每個家庭只有一行，相等於以前嘅百分之一」，而且早前業主已收回土地。「我哋生活形態經過8年，仲未完全恢復昔日基本耕作」。
■記者謝明明、譚靜雯