因為公職人員失當罪成判囚20個月嘅72歲前特首曾蔭權，服刑兩個月後喺4月底獲准保釋等候上訴，案件排咗喺9月26號開審，佢日前（10號）7點幾，就坐住一架政府AM車牌嘅7人車喺中環雲咸街落車，身邊就有一個保鑣隨行，佢一身藍恤衫、白西褲樸素打扮揹住嗰背囊成個電車男咁，同佢以前西裝骨骨嘅bow呔造型，分別好大喎。
好奇寶寶四圍望
八方同事當時見到煲呔一路雙手插褲袋，一路沿住雲咸街行，精神唔錯，但喺入獄前黑髮嘅佢，喺獄中冇得染髮，出番嚟照舊一頭白髮，冇染黑。
煲呔沿途路經商舖、後巷時，好似好好奇咁，停喺度望一望，去到一間賣中國古代服飾嘅舖頭，佢就望咗好耐先再動身。
之後佢路經一間酒吧時，就同一名途人握手，其後落斜路經過便利店後，就停喺度打書釘，當中佢望住一本係新特首林鄭月娥做封面嘅財經雜誌，凝神望足半分鐘，不過就冇用手揭嚟翻閱。
沿途陪住佢嘅保鑣都好有警戒心，不時周圍望，其間煲呔仲同佢停喺度研究泊喺路邊嘅麥拿倫跑車，沿路途人都唔少，但就似乎未有認出佢係前特首囉。
李八方