林鄭新班子上場後首個燙手山芋，本來預計係喺周二出爐嘅一地兩檢方案，過去兩、三個星期司局長頻做騷，無非係為咗方案儲定民意子彈，希望喺立法會挾民意易啲過關，點知法庭突然判4名立法會議員被撤銷資格，雖則唔少人覺得DQ風波未算喺社會引起好大迴響，但之後係咪合併補選，卻極易引起爭議，始終關乎議會勢力分佈，民主派點會唔同政府死過？
花生友聽聞早喺前朝政府，有官員已經覺得要將兩次因為宣誓案而出缺嘅議席夾埋一次補選，唔多現實，皆因兩者時間上差距實在太大，梁游案嘅終極上訴許可申請8月25日開庭處理，事件好快知道係咪劃上句號，選管會按理應喺4至6個月內籌備補選，冇乜理由等埋長毛等人嗰單官司啩？尤其部份人或者上訴，若然堅持「等埋長毛」，嗰份司馬昭之心，勢引起反彈。
倘合併 建制或攞多幾席
有利益衝突嘅建制當然唔係咁諗，如果唔合併補選，又點會有漁人之利，趁勢攞兩三席？據聞有人私下建議可以喺坊間造勢動員，話分兩次補選實在太浪費公帑，留番啲錢喺畀市民用，例如財政預算案時由財爺陳茂波派糖，想藉此利誘市民支持合併補選噃。
有建制派仲話西環對補選花落誰家，緊張過添馬艦政府，皆因建制議員最終聽邊支笛，大家心照；亦有建制意見認為，若然唔合併補選，對林鄭班子未必無賺，喺建制派甚或西環施壓下，依舊執正嚟做，仲唔係公平公正？仲話若然梁振英仲做緊特首，肯定有答案咯！
花生友