勇士球星史堤芬居里（Stephen Curry）上周六喺北京展開今年嘅亞洲之旅，而佢今次仲帶埋效力小馬嘅細佬S居里（Seth Curry）一齊訪華，「咖喱仔」仲轉行挑戰乒乓球「一姐」丁寧！
咪睇咖喱仔喺籃球場上大殺四方，佢喺乒乓波枱上對住丁寧失誤連連，五分制嘅賽事中以2:5落敗，不過佢就講笑話：「我攞到一分都當自己贏咗。」咖喱兄弟仲喺活動化身教練指導Jr. NBA小學員運球技巧。
另外，拿化波爾（Lavar Ball）上周六帶領佢隊Big Ballers打比賽時，隊中球員下半場偷波時犯規，「波叔」投訴不果再俾球證判技術犯規，令佢嬲到拉隊離場抗議；雖然球隊當時以69:60領先，但最終被判棄權輸波。