港股九連升後終斷纜，惟上周五單日僅跌34點，成交亦大，市場似乎不太害怕有可能出現的調整。友人問密西比，有無留意今次升市，雖則累計升逾1,300點，但居然不見有甚麼「股神」出來「認屎認屁」，自己表揚自己預測股市是那麼的精準。
友人說：「首先講番今次升市係乜嘢帶動，大家好清楚，今次呢個所謂牛市，係內地資金帶動嘅，仲要係啲唔理基本因素嘅資金，覺得隻股好，個名又識就衝去買，所以升市前上至基金經理，下至財經演員，呢水升市都睇錯晒。」
他續說：「由於今次真係堅睇錯邊，咪冇乜人出嚟話自己估啱。」基金經理也看錯，首半年基金表現又要見紅？友人笑指此言差矣。他說：「基於今次升市都係集中喺出名股同大價股，一般傳統基金都係有錢賺嘅，多少就要睇佢有冇落重注騰訊……聽講話，有基金賺20%開外。」
表現理想，今年花紅「坐定粒六」？友人指還欠一樣東西。他說：「現時就爭個似樣嘅調整，跌完再買多啲貨，咁就打風都打唔甩喇。」原來如此。
密西比