特首林鄭月娥三令五申問責官員「自己的事自己做」，唔可以假手於人，要多落區體察民情。林鄭由高鐵到流感，統統親自出馬，下屬當然要交吓功課啦，好似發展局局長黃偉綸上任之後，每個星期日都好勤力咁寫網誌，交代吓自己做過咩（唔會係怕阿姐覺得佢hea住做冇貨交啩？）。噚日趁住八號風球，黃偉綸就順勢講佢之前去咗大埔區視察水浸黑點嘅經歷嘞！
黃偉綸話今個月18日大埔區錄得雨量已經達黑雨級別，汀角村同大美督村出現嚴重水浸，所以上周五就去呢兩條村視察，又話渠務署、屋宇署、水務署同大埔民政事務處連日已搶修受損河段。之後佢就解說政府多年來做防洪、改善水浸嘅工作，最後當然唔少得加番句奶媽口頭禪，話會「急市民所急」！