中環在線:一田一姐八號波出世!咁啱嘅! - 李華華

中環在線:
一田一姐八號波出世!咁啱嘅! - 李華華

噚日朝早天文台忽然掛起八號波,連一年一度嘅書展都要暫停半日,殺大家一個措手不及。但一田就無有怕,將軍澳分店照樣開張大吉。一田百貨CEO黃思麗(Susanna)順便自爆,話當年都係掛住八號波出世。
Susanna話,今次活動好難得請到熊本縣營業部長KUMAMON一齊出席,KUMAMON出名「甫士」多,仲開心到跳舞,睇到在場人士鬼咁開心。
老實講,一田呢招係醒嘅,噚日星期日,遇上打風,一班將軍澳街坊都唔想坐車出街喇,於是齊齊湧晒去一田睇開幕禮湊熱鬧,成個場不知幾咁熱鬧呀。