黃炎華的辦公室在上環水坑口街盡頭，一條別人一分鐘行完的小鈄路，曾幾何時，他要行足足半小時。「嗰段路，就好似上珠峰咁辛苦」。戲言成了真，今年4月，熱愛運動的他跟隨攀山專家，成功挑戰海拔5300米珠峰大本營。「人在山中，一口氣最重要」。死過翻生的感覺，他其實並不陌生。31歲患上末期腎衰竭，每天洗腎，仍堅持繼續工作，又帶着210公斤洗肚水，與妻兒歐遊。「盡量如常生活，唔當自己係病人」。沉着氣自我鍛煉，苦候4年，他說還得感謝捐腎給他的人，讓他找回風光明媚的第二人生。
記者 呂麗嬋
相約香港移植運動協會創會主席黃炎華在伊利沙伯醫院大堂見面，剛抽完血的他精神奕奕。「之前換咗隻藥，要睇反應，所以返嚟驗血」。50歲的他，一身運動裝，身型fit爆，很難想像竟是長期病患者。長達4年每日洗肚，年前換腎，但終生仍得服食抗排斥藥。「上珠峰，有一定危險，要好留意身體變化，患咗腎病咁多年，呢方面比一般人敏感」。血壓急升，心跳加速，身體細微警號，他都會留意到，停下來深呼吸，放慢腳步。「久病成醫，無辦法」。他打趣說。
強烈的病人意識，反成了他安全登山的護身符，他笑稱更意想不到的是，擅長徒手潛水，原來對上珠峰也有利。「行山其實唔係我專長，一隊人上山，一直墜後，不過因為我好鍾意徒手潛水，閉氣閉得多，山上空氣稀薄，比其他人長氣」。人生，果然是一場耐力賽。「頭一、兩日已出現高山反應，痾咗兩次，間竭性頭痛」。山上溫差極大，朝早陽光直射，30幾度高溫，夜晚就急跌至零下，他笑說人在山中，最大娛樂除了張羅吃和痾，就是進行「小實驗」。
「山上空氣稀薄，動作一定唔可以好快，我哋會做好多唔同嘅小測試，比如會用力唱歌，第一句好雄壯，唱到第二句就無咗聲；試過圍埋鋤大D，一興奮掟牌，又會氣喘到不得了」。面對茫茫雪山，走過高山低谷，學懂謙卑，原本只是陌生人的雪巴人響導，也成了朋友。「離開時身上所有嘢，包括太陽眼鏡同外套，都放低送俾佢哋，呢啲係有用物資，緊要過隻勞力士，你背包入面載滿金條都無用，人在山中，一口氣最重要」。
千難萬難，完成8日登山之旅，畢生難忘。成功登上大本營的，還有58歲的病友陳國明。患慢性腎病達20年，6年前換腎重生，病齡極長的他，決心變強壯，追回失去的時間，由慢步到慢跑到行山，混然忘我。「由出院到參加十公里馬拉松，足足用上三年，後來再挑戰半馬、全馬，之前喺黃金海岸，完成人生第11個全馬」。下定決心做運動鍛煉體魄，以此回報將他帶離鬼門關的器官捐贈者，他說更希望藉此宣揚器官捐贈，讓其他病友和他一樣，可以重生。
本身是物理治療師的攀山專家吳俊霆，是促成這次奇幻旅程的幕後功臣。他是香港成功登上珠峰的第7人，也是第二位登上8163米高Mt.Manaslu的港人，因任世界器官移植運動會隨團治療師，而與黃炎華結緣。「佢係運動員之一，見到好多病友重新振作，好感動」。他謂已將登峰經歷剪輯成紀錄片，於今日（7月22日）在浸大作慈善放映，為器官移植運動協會籌款；另3人組周日將重組，與心肝肺腎及骨髓移植者及醫護人員，出戰渣打慈善家庭跑。