【本報訊】前特首梁振英經常自誇任內為土地房屋做了大量工作，更指前任政府未有做好開發土地工作，前特首曾蔭權昨不點名反駁梁指控，強調任內「未曾停過一分鐘開發土地」，又指土地由開發到建成樓宇要10年以上時間，「今時今日起嘅樓，係曾蔭權嘅時間或者董（建華）先生嘅時間，當時開發土地而做出嚟嘅」。
曾蔭權昨在有線電視接受前立法會主席曾鈺成訪問，提到任內貧富差距擴大，曾承認香港按《基本法》實行資本主義，貧富差距是必然產品，但不覺得港府屬「小政府」，因為香港有一半人都住在資助房屋。
指新樓是以前成果
曾蔭權亦回應外界指停建、停售居屋的做法，導致今日高樓價的指控，曾蔭權不諱言「好多人就話曾蔭權做咗好多惡行」，他亦「完全接納人哋啲批評」，不過他提到1999年、2000年間，「當我哋呢個房地產泡沫爆破，負資產嘅人好多，有啲人仲跳樓，唔好講話當時賣樓賣唔去，我哋啲居屋都冇人買」。
對於有指因沒有人買樓而「放慢唔起（樓）」，令後來房屋供應短缺。曾蔭權反駁，「但係你諗吓如果我哋賣咗出嚟、再賣嘅時候個市再冧咁點算？」又稱若居屋無法出售變成「餵老鼠」，「立法會會唔會放過你呢？」曾鈺成聞言亦表示「當時係呀」。
曾蔭權再解釋，現時社會上有人指摘他停止開發土地的言論有錯，強調自己任內「未曾停過一分鐘開發土地，不停開發土地」，又指「從一個發展土地直至起到樓嘅時候起碼都係11、12年嘅時間」，「換句說話，𠵱家今時今日起嘅樓，係曾蔭權嘅時間或者係董先生嘅時間，當時開發土地而做出嚟嘅」。
另外，曾蔭權回顧40多年的公務生涯，包括退休後及入獄的60多日，形容「都係充滿感恩」，「呢個感恩就係市民大眾對我嘅關愛」，雖然市民會忘記他的功績，「但係對我嚟講，我自己感受到係正面多於負面一切」，強調自己一生都相信香港人，亦相信只要對港人有充份的信任和愛，港人自然會作回報。
■記者呂浩然