2016至2017年度馬季在上星期日結束，今季左丁山之沙田馬場出席率達100%，繼續可在下季訂到長枱，唔使為訂位而忙。最後一個賽馬日之前，公關大姐大邀約十位八位老友記去跑馬，預訂咗百合廳第一號房間請左丁山到沙田跑馬，當然逢請必到咁滯，純屬交情聯誼，若以賭馬觀點睇，就多數唔盞鬼，因為成班唔多熟悉賽馬嘅朋友坐埋一齊，一人一句，口水橫飛，評彈政府，月旦時事，分享八卦趣聞，仲邊度可專心去刨馬及研究賽事大勢吖，如此環境下，輸少當贏就係最常見場景。
左丁山已有好多年未去過百合廳，呢次去到，發覺百合廳因地方較大，裝修得比「六十年代」廂房更好更舒服，第一號房有玻璃大窗，有露台可出外睇馬匹轉入直路，可坐一圍12人，最過癮嘅就係房內有一專用投注櫃枱，投注唔使走出房間，於是立即問吓訂房嘅最低消費，答案係12人一房要8500元，又唔算貴噃，如要請客或聯歡，呢間房值得考慮之至。
一坐低李純恩就問：「朋友有隻火天大有，第二場5號，你話有冇機會？」左丁山以前買過，輸到離行離列，於是隨口答：「唔使睇！」李純恩又話：「阿叻俾貼士，第四場盛勢，機會又點？」左丁山話：「大熱門，好有勝望。」
唉吔，撞口卦，買兩隻馬贏位混合過關咪好囉，但心中早有偏見，第二場落到沙圈捧吳嵩場，梗係買佢隻3號智有心得啦，預備同佢一齊拉頭馬嘅嘛！唉吔吔，智有心得力追不及，輸條頸，屈居第二，邊隻在前面呀？撞邪，就係5號火天大有，連吳嵩都為之望天長嘆！3、5條Q派955元，本應手到拿來，偏偏對火天大有視而不見，聽而不聞，咁就見財化水，俾李純恩笑到面黃。智有心得嘅練馬師係鄭俊偉，當日還欠一場頭馬先至夠16場畢業，左丁山對佢講：「今日你實掂。」鄭俊偉答：「你係上帝？話我掂就掂？」呢呢，好快就知道，第三場鄭俊偉馬房嘅仁仁友福果然勝出，令鄭俊偉過關，友福就即係有福啦。左丁山第二場失去贏大錢機會，之後場場捐輸，又當捐錢做善事。今個馬季最後一天，總投注額高達18億5千8百幾萬，全季投注1174億創歷史新高，豈止馬會笑，特區政府又可以收入大量博彩稅，估計高達一百三十幾億元，係政府一個好重要嘅稅收來源！7月16日之後，大家又期待下個馬季來臨，唔使等好耐，9月3日又在沙田見面。