憑《十二道鋒味》「轉行」做「廚房佬」、近年忙於喺廚房同啲刀叉碗碟食材交流嘅謝霆鋒，日前現身北京宣傳節目《鋒味》，語出驚人，因為佢 講 真 話！
話說，活動現場，謝霆鋒被問到日前喺網上流傳一段「謝霆鋒騎小車買菜」嘅新聞，佢笑言自己經常揸呢架車去買餸，亦唔怕被人認出：「沒關係，我經常在三源里出現的。」仲講到自己喺街巿不時收到商販嘅小禮物。唔明可以睇圖。
然後，重點嚟喇。
喺香港已經開咗曲奇店嘅霆鋒，在台上被問到會否考慮開餐廳，等更多人試到佢嘅廚藝，霆鋒話：「我喜歡是不斷創作菜，但是要經營一家餐廳，這個不是一件那麼簡單的事，因為我對這個食材的安全，食材的這個新鮮度，要求挺高的，我覺得很難很難，起碼在我現在的這個階段，是比較不懂怎麼去經營這樣的餐廳。」呢個係大陸版本。
但霆鋒講到佢最關注嘅食物安全喎，點止講咁少？
據香港有線新聞報道，霆鋒講食物安全嘅問題時，仲有以下呢段：「在美食上呢，我發現過去十幾年在咱們中國，每個人對美食、對食物的要求、需求都是大量去增長，但是反而對食品安全呢，我們又發現這裏有地溝油、這裏的米是假的，這裏又不能吃，那裏又有甚麼重金屬。」
根據新華社近日發佈嘅《新華社新聞資訊報道中的禁用詞和慎用詞》修訂版本中，，就連「三權分立」都唔講得，「國立台灣」唔可以加「國立」兩字(呢樣嘢香港一早做緊喇)，「台灣省」唔講得要寫「台灣地區」，簡單而言就係真話唔講得。地溝油假米假蛋食材重金屬呢啲真相，點見人呀？