【西灣河】現年43歲的新城DJ葉文輝（啤梨）前晚在電台節目預告將有事發生，原來他精心安排，向拍拖4年的圈外女友Michelle求婚，並獲女友答應。前晚約10時許，啤梨帶了愛犬Mocha和女友到西灣河鯉景灣海旁拍拖，他更同時在facebook玩直播，女友發現附近出現拍攝隊及親友，她即顯得不自然，Michelle說：「你唔好搞啲咁嘢。」隨即怕醜投入男友懷中，啤梨肉緊攬實安慰。
送上兩卡鑽戒
隔了一會，啤梨情深捉實Michelle的手，而海上有一艘郵輪經過，船身上的巨型LED燈閃出「Michelle will U marry me」，啤梨單膝跪地，並遞上一枚兩卡鑽戒向女友求婚，女友感動點頭答應，現場見證的友人都歡呼起來。啤梨說：「我唔識𠱁你，成日掛住做嘢，我又唔識畀驚喜你，不過我會好好照顧你，當我好肥嘅時候你都冇走，希望我會變番靚仔。」一對準新人都好感動，而眼濕濕，Michelle更收到99支紅玫瑰。
啤梨和Michelle更應親友要求咀嘴，他感謝大家的祝福，與現場友人稍為吹水後，才與未婚妻及兩友人先行駕車離開。陸浩明在啤梨fb留言祝福：「恭喜啤梨，好幸福甜蜜。」
造人順其自然
記者昨致電啤梨，他仍難掩興奮說：「呢次求婚係一早策劃，大家都有共識認定對方，我覺得一定要求婚嘅，平時我好悶蛋，好希望令全世界人知我搵到另一半。」他表示明年做新郎：「婚期未定，結婚相好想出埠影，想去日本。」造人計劃就順其自然，啤梨說：「雙方家長都冇壓力，即將做人夫，我要加倍努力，希望畀到太太幸福將來。」
採訪、攝影：梁繼光、朱志聰、陳杰