95歲嘅廣播劇界「開山祖師」李我日前因身體不適入院，《蘋果》記者去過醫院探李我叔，見到佢嘅精神好好，太太蕭湘亦都話佢已經好番好多，氧氣、強心針嗰啲都拔咗，只係因為佢體內啲鉀低，仲要一段時間睇住佢。
湘姨日前接受周訪問刊，佢話大約喺一個月前，李我叔突然冇乜胃口，就算餵佢嘢都會用手捂住個嘴，過咗幾日仲上吐下瀉，入院之後醫生話情況唔係好理想，要即刻注射強心針，叫屋企人有心理準備，湘姨都做咗最壞打算！估唔到李我叔嘅生命力好堅強，捱過咗呢一關，本來可以出院，不過抽血報告話佢嘅鉀數偏低，擔心出院之後情況轉差，於是繼續留院觀察！
湘姨仲話李我叔其中一個問題係因為尿道受感染，醫生話年紀大抵抗力當然冇咁好，可能隔咗一輪又會再入院，所以要有心理準備，不過湘姨話近呢一年李我叔經常出入醫院，已經習慣咗，雖然李我叔成日話自己過唔到96歲，不過湘姨勸佢唔好諗咁多，要開心面對每一日，唔好諗太多未發生嘅事，好似佢自己一向做人開心又樂觀，所以到咗88歲仲可以行得走得！