香港「美人魚」歐鎧淳（Stephanie）嘅新書《淳分享》噚日喺灣仔書展面世，早上嘅新書分享會，吸引逾200名粉絲到場，連羽壇「黑妹」葉姵延都現身力撐。
Stephanie出書前曾擔心有冇人嚟分享會，但噚日除咗部份泳壇中人，甚至母校聖心嘅老師，更有唔少家長帶同子女到場。Stephanie話前晚有啲緊張又興奮：「雖然冇好似奧運前咁緊張，今次係興奮多一點，發夢似被人追，可能出書有啲壓力。」佢仲多謝一班到場支持自己嘅朋友：「知道有好多我未必叫得出名嘅朋友支持我，好多謝佢哋。」
夜晚輪到「蛙后」江忞懿同「跳高女神」楊文蔚喺書展出席香港精英運動員分享。佢兩個喺分享會中都唔認同「贏在起跑線上」呢個概念，文蔚仲話：「我14歲先開始跳高，我喺屋村大，好多嘢都要靠自己。一個人嘅性格同點去準備之後嘅挑戰同堅持先最重要。」