雖然兩支英超球隊李斯特城跟水晶宮無緣在香港舉行英超亞洲盃對壘，但就可以在《FIFA 18》版英超亞洲盃一決高下！遊戲廠商EA特別請來這兩支英超球隊球員及幾位亞太區KOL，一齊參加在香港舉行的《FIFA 18》試玩活動，並分隊比賽爭逐英超亞洲盃，兩隊英超球隊所派出的陣容都幾強，水晶宮就有賓迪基、唐辛、沙高及沙高壓陣，至於李斯特城則派出馬列斯、施利文尼及艾馬迪等球星，到底球星上場踢波就叻，打機又得唔得呢？
先介紹《FIFA 18》這預計在9月底推出的新足球遊戲，雖然今次試玩的只是Beta版本，不過都可以體驗到更像真的運球動作，星級球員的獨特盤球姿勢如C朗拿度的大步推進與美斯的碎步盤球都可以忠實呈現。今集球隊戰術的AI系統亦唔會一式一樣，強隊的走位配合及反應都會如真實球隊咁高明。另外《FIFA 18》亦會加入地區特色設計及新慶祝場面，例如南美球迷非常熱情，球場會佈滿彩紙碎，而且入球後球迷會衝到看台最前方慶祝，不過在今次試玩中只可揀幾隊歐洲球隊，未能體驗到這兩項新設計。
講番比賽，香港KOL代表達哥被安排同水晶宮射手賓迪基同隊作賽，結果連贏兩場後，一如達哥賽前目標打入決賽，迎戰李斯特城王牌球星馬列斯的隊伍。雖然最後達哥同賓迪基所操控的巴黎聖日耳門以1:2不敵操控皇家馬德里的馬列斯一隊，但賽後達哥同賓迪基都識英雄重英雄，達哥讚賓迪基鍾意扭波又經常笑，球技唔錯，而賓迪基亦讚達哥幫到手。至於英超球星又點睇《FIFA 18》這款足球遊戲？賓迪基同水晶宮隊友唐辛都讚遊戲變得更像真，玩開《FIFA》系列的英格蘭國腳唐辛更話今集圖像及走位上都有輕微改進，更期待正式推出時會有更多改進。至於兩位球員玩《FIFA 18》時又會揀邊隊作賽，唐辛第一時間就答水晶宮，然後就話會揀皇家馬德里，至於賓迪基就話會揀巴黎聖日耳門，國家隊就揀比利時！
記者：布偉倫
攝影：徐振國