隔牆有耳:神探伽利略做非執董 - 李八方

隔牆有耳:
神探伽利略做非執董 - 李八方

近排好多新股排隊上市,噚日就有5隻新股「敲鑼」,以明樑控股表現最好,一度爆升超過1.7倍。點解咁犀利?咁就要問問「神探伽利略」。唔係日劇嗰個,講緊係有「港版神探伽利略」之稱嘅理大前機械工程學系工程師盧覺強教授(盧Sir)。
盧Sir噚日罕有喺上市儀式出現,原來佢係以明樑獨立非執行董事身份現身。盧Sir專家證人做得多,但上市公司獨董則係第一次。他話今次出任,皆因明樑主席吳麗明係佢嘅學生。他話教咗咁多年,應該係首次有學生嘅公司上市,作為老師都開心嘅。
明樑都冇令盧Sir失望,明樑股價大幅跑贏其他新股,收市報0.89元,較招股價0.47元升89.3%,每手賬面勁賺4,200元。不過,盧Sir話一股都冇持有,所以荷包冇脹到。盧Sir呢位獨董年薪15萬元,同時係明樑薪酬委員會主席,及審計委員會等等,唔知日後有冇機會用到盧sir嘅機械工程學智識呢?

理大前機械工程學系工程師盧Sir噚日罕有喺上市儀式出現。李潤芳攝