被取消議員資格的社民連長毛梁國雄，噚日以「大嶼山機場航道關注組」代表身份，再次現身立法會公聽會，就政府建議於大嶼山北面設立新主要航道發表意見，會上長毛鬧政府更改航道，一定會對海洋生態帶來影響，亦會影響漁民謀生，批評政府係「大石砸死蟹」，認為政府推行建議時諮詢不足，根本係畀一啖蜜糖你食，跟住畀你食砒霜。
八方以為建制派未必認同長毛咁講，點知民建聯漁農界議員何俊賢會上發言，一樣講明會投反對票，又話好不滿政府未有回應漁民訴求，要求政府交代除設立新航道外，仲有冇其他的措施。長毛會後讚何俊賢會上表現「非常英勇」，不過長毛嘅讚明顯有骨，話對方冇講明係咪成個民建聯都投反對票，得佢何俊賢一個嘅話有乜用，政府淨係DQ民主派議員都4個啦，話何俊賢所謂反對有啲偽善。