按慣例特首夫人以往會做好多非政府組織同慈善機構嘅贊助人，不過現任特首林鄭月娥一早講明，佢丈夫林兆波因為想低調，唔會出任呢啲公職，咁呢啲非政府組織同慈善機構點搞好呢？原來好多機構已改向林鄭打主意，邀請佢代替丈夫做贊助人。
好似香港愛護動物協會董事會已去信林鄭，邀請佢做該會贊助人，另一個一向由特首夫人做名譽贊助人嘅組織綠色力量，執行總幹事文志森話已去信特首辦請林鄭做名譽贊助人，但𠵱家都未有回覆。
有機構改請特首做贊助人，亦有機構索性搵其他名人做贊助人，好似傳統上由特首夫人做會長嘅香港公益金，已決定由李業廣接替前特首夫人梁唐青儀做公益金會長，有部份機構就仍未決定點處理，好似香港撒瑪利亞防止自殺會、香港防止虐待兒童會咁，話要再商討搵乜人做贊助人。