九西居民要捉老鼠，有經民聯梁美芬幫佢哋；如果要滅蝨，以後可以搵公民黨油尖旺區議員余德寶嘞，皆因佢過去接到超過70宗有關木蝨嘅求助個案，上門義務協助滅蝨有15宗，最近佢亦同義工專家一齊出動，成功變身「木蝨寶」。
余德寶話本來對木蝨係點樣都唔知，因為一個街坊個案同木蝨「結緣」，之後不時跟住滅蝨師傅出動，家陣大約都識分木蝨嘅嚴重程度同埋消滅佢哋嘅秘技。佢話一般都係以本區居民為優先滅蝨服務對象，尤其係公公婆婆，如果係有力氣嘅街坊，會建議佢哋先試下搬起床褥用膠紙包實晒啲木等方法先。
因滅蝨事迹廣傳，余德寶話有唔少區議員跨區向佢請教滅蝨；佢試過有次滅完蝨，帶咗隻蝨返屋企，知道有木蝨嘅生活幾咁困擾，希望房署處理木蝨問題。