【香港書展2017】何韻詩去年12月被爆背着台灣女友鄧九雲跟女助手方迦南撻着，兩人在貝沙灣坐石灘睇日落餵食兼搭膊頭輕吻，有指阿詩因為方迦南介入而跟鄧九雲分手。阿詩昨日到灣仔會展書展為第三本新書《行旅．往後》舉行座談會，不但新歡方迦南有現身，其舊愛亦在同日晚上踩入會展，認真巧合。
「我𠵱家心如止水」
方迦南昨日為阿詩活動打點，但見到記者時顯得有點避忌。座談會上阿詩指今年踏入40歲，所以專程返自己成長的加拿大，寫一些昔日到現在經歷的往事。阿詩說：「我有返校園，諗起好多以前暗戀過嘅人，但冇搵番佢哋，我以前只識暗戀，唔識表白，因為嗰個時候，同性情感唔係咁易講出口，只係會暗戀、暗戀、暗戀，我以前有個暗戀同校同學，特登兜去佢個課室偷望，好明目張膽。」問阿詩現在有許多人暗戀她，不用再暗戀人？她說：「唔好咁講，細個冇自信，唔似𠵱家咁癲喪，但我𠵱家係心如止水。」
問到方迦南前來幫手，以及同日鄧九雲出席書展，阿詩會否捧場支持舊愛等問題，阿詩卻說：「唔講呢啲。」助手陪到加拿大看她回憶舊戀人時會否心酸？阿詩說：「唔會，人總會有過去。」
鄧九雲昨晚在會展宣傳去年作品《暫時無法安放的》，其位置跟阿詩攤位十分接近，轉個彎便到，但二人同場而不相見。鄧九雲表示不知道阿詩出書，因自己昨日才到香港。 問可有跟阿詩聯絡？她說：「我剛到，本來我也想跟你們多講些甚麼，但我真的沒有甚麼跟你們分享。」有傳阿詩有新戀情，鄧九雲就顯得不願多談：「朋友開心就很好。」
盧覓雪搵過梁洛施
昨日書展上還有歐鎧淳、盧覓雪、李家鼎與黃淑儀等，對於梁洛施之前被影到返港湊仔，身為其好友的盧覓雪昨表示有跟對方聯絡，並謂：「佢幾好。」但有關梁洛施是否返港定居及有何動向？盧覓雪表示沒有多問對方。歐鎧淳昨向小朋友講故事，男友胡子彤亦有撐場。
採訪：王連連、羅慧敏
攝影：陳俊強