奶媽特首林鄭月娥前日就去完書展，噚日就輪到兩位新任局長，商經局嘅邱騰華以及政制局嘅聶德權。兩位新局長分別喺前特首曾蔭權同前特首梁振英年代做過新聞處處長，公關功夫有番咁上下，噚日所見，佢哋貫徹奶媽要求嘅「貼地」精神，同一班年輕人有講有笑，推介書本同埋買書，亦不忘要政治正確，齊齊買一帶一路嘅書。
商經局長愛逛樓上店扮文青
商經局長邱騰華噚日朝早去咗書展同青年對話，佢就好識做，話每年都會抽時間去書展，收工後夜晚10點、11點左右抽時間去，平日因為工作忙，所以睇書都要偷時間，好似去公幹時趁住坐飛機嘅時候睇書，又或者星期日朝早起身之後睇吓。
唔講唔知，邱騰華有個習慣，每次剪完頭髮就去行書店，兩者有乜關係？之唔係佢剪開頭髮嘅髮型屋附近有書局囉！仲話佢好鍾意行樓上書店，因為有種文青、兼夾大隱隱於市嘅感覺。照咁睇，銅鑼灣書店好係邱騰華杯茶喎。
咁邱騰華向年輕人推介邊本書？佢分別推介由一位醫生離世前寫嘅自傳《When Breath Becomes Air》，同作家Malcolm Gladwell寫、用理性分析大衞如何戰勝巨人哥利亞嘅書。佢話想藉此講人人嘅能力都唔同，所以世間冇必勝嘅策略，反而做好準備、有勇氣去挑戰同埋唔怕壓力先係致勝關鍵，唔知呢個係咪佢當年做煲呔「心戰室」嘅心得呢？邱騰華之後就同成班後生仔行書展，仲自掏腰包喺青協嘅攤位買咗一本有關背包客同埋一帶一路嘅書先走。
政制局長沉迷推理冷落老婆
邱騰華朝早行完書展，下晝輪到政制局長聶德權（Patrick）。聶德權非常落力同青年人打成一片，好似有青年人推介《如果我在東京不快樂》呢本書嘅時候，Patrick即刻反問點解喺東京唔快樂呢？雖然個gag有少少爛，但都換到唔少笑聲。
講到讀書習慣，原來Patrick以前好鍾意睇推理小說，試過睇到連老婆叫佢做嘅嘢都冇做，淨係掛住睇書，不過讀理科出身嘅佢，後來自覺只係講科學就太冷酷，於是又開始多睇同人文有關嘅書。難怪佢向青年推介嘅兩本書都好勵志啦，第一本就係由物理治療師吳俊霆所寫，講述佢登峯嘅《吳俊霆走過的天與地》，另一本就係由水哥張樹槐所寫嘅《跑出一片天》。
本身都鍾意運動嘅Patrick仲分享，佢至今都每星期跑5至10公里，繼今年初喺渣馬完成咗第一次半馬，嚟緊嘅目標係再接再厲，因為跑半馬都唔易，而唔想自己跑唔掂、搞到被人送上白車而見報，就係佢跑半馬嘅最大「動力」。
之後Patrick亦喺青協攤檔買番本一帶一路嘅書，仲乘機硬銷話，佢做嘅內地事務都同一帶一路有關，例如大灣區發展，所以佢會同邱騰華密切合作。