自從特首林鄭月娥上場之後，中聯辦主任張曉明就變得低調，唔係好見佢再出嚟對香港問題指指點點，但唔代表小明唔使響應中央要求，落區搞形象工程喎，好似佢噚日就第一次踩落書展，除咗參觀之外，仲不忘「巡視業務」同擦國家主席習近平鞋。
小明去書展巡咗成個鐘，先後去咗商務印書館、三聯書店、明報出版社、大眾書局同四川出版集團等多個攤位參觀， 點解八方話佢「巡視業務」？因為商務、三聯所屬聯合出版集團，正係由西環以內地公司掌控！小明應該係第一次去書展，佢對傳媒話早就聽講香港書展人氣旺，噚日一見名不虛傳，小明喺書展仲買咗3本書，分別係《周恩來答問錄》、《習仲勛畫傳》、《香港如何「帶」「路」》，習仲勛係習近平父親、一帶一路又係習嘅主催政策，小明真係買書不忘擦鞋！