【專題籽：一周突襲】
逢星期三下午三點走到荃灣香車街，都會見到阿謙和他的團隊執住大堆回收布條，利用燈柱、路牌下的柱，甚至商店簷篷開壇編織，近來更多了架「四方城」木頭車，放在福來邨街坊聊天吹水的公園，讓大人細路齊齊織。這個於1963年入伙的福來邨，可說是似為在柴灣角工業邨工作的人而建，邨內許多七、八十歲的老人家，都是出身自紗廠或製衣廠。他們利用編織，勾起街坊當年的點滴回憶，如講吓當年在紗廠對住一張床咁大的織布機，有街坊還跟他們分享許多昔日的織布方法，將紡織工藝活現社區。
帶動紡織製衣的，還有「真的變身鳥」的設計師熊銘健（阿健），他在柴灣角街的工廠區開了個小小的「山寨廠」，請退休製衣工人幫他製作新設計的衣服，17歲就入行的張志謀師傅便是其一，當年有冷氣學徒唔做，貪玩跟朋友跑去製衣廠學做裁床，那個年代是「新潮、好玩又好賺」的工作，「做學徒人工二百蚊，我一入行做裁床、剪布就三百蚊，四百、五百係咁升。嗰陣好多工廠都要人，我哋接單喺呢間做三、四日、又去第二區做三、四日，趕交貨時捱通宵收入更多，密食當三番，好好搵的！」直至講到九十年代，本來笑笑口的張師傅不禁搖頭說：「唉，後來就係生產過剩，令製作成本仲貴過售價，咁梗係搬走，要錢唔要貨啦！」由風光走到沒落，這就是昔日荃灣紡織工業的歷史背後，同樣也是香港人值得記着的一段歷史。
記者：陳慧敏
攝影：劉永發、張志孟
編輯：黃世恩
美術：楊永昌