港滙長期企在7.8或以上水平一段時段，據資深同事認為，不排除稍後有資金趁高位等機會沽空港股，泊港等食大茶飯。
老樓唔多識股票，只知一旦港滙走弱，代表資金流出，對樓市造成下調壓力；假若同事無講錯，當股票有突發事件發生，挾倉賣港股，下跌回去年底兩萬點也不出奇。
這可能是為何最近一手盤反應那麼弱其中一原因，連港島西區盤63 Pokfulam都賣得咁差勁，除了資金不流入樓市外，仲有溢價太高嚇退買家，反映了樓價已超出一般負擔能力時，購買力便會停下來。縱使兩大發展商長實（1113）加新地（016），自5月份後新盤銷情已經冇之前咁爆，中國人有句說法「物極必反」，正是樓市調整的先兆。
市場是最誠實的，冇得呃人，排隊人士可能作假，但成交不能假（因有一手條例監管），賣樓出現的人肉排隊人潮，冇可能個個係媒，正如63 Pokfulam收票逾600票，首天只賣得13伙，這點冇得假。
股市勢如破竹，向29000點進發尚有2,000點，上周一周升了1,000點，為過去一年未見過，老樓更加相信有大戶等一鋪賣起港股。
老樓手上亦有股票，大部份為藍籌股和科技股，因買了很久，可以承受下調壓力。近兩個月成交大增，估計不少散戶入咗局，形勢有如樓市預支了年輕客的購買力，大市若有大波動，首先受傷便是近期入場的散戶。
投資市場沒有長升之理，尤其是股票，大孖沙今年分別回購股份撐住公司股價，若然大跌市來臨，蝕極未到肉，但散戶便輸身家了。
劉兆昌
資深地產傳媒人
http://www.HKLau.com
本欄逢周五刊出