呢排差唔多日日都有新股上市，港交所（388）收上市紀念品收到手軟，噚日掛牌、從事製造光纖與光纜嘅高科橋光導科技（8465）就送咗個……，唔好諗錯隔籬，佢其實係一個「水晶座」。但正如周星星話齋，睇落係隻鞋，其實係風筒，佢嘅真身其實係「光纖」。
公司方面話，個座以「光纖預製棒」為原材料製成，光纖預製棒係光纖前身，將佢放入熔爐拉絲出嚟嘅就係光纖。
公司話，紀念品冇乜特別含意，但高科橋嘅歷史，同佢份紀念品一樣，表面睇好普通，背後好巴閉。高科橋嘅前身「高科橋光纖」，創辦人係諾貝爾物理學獎得主、「光纖之父」高錕喺2000年創立，生產光纖，但唔知點解，3年後就易手畀現任大股東、內地商人王建沂。
重點係，高科橋生產嘅光纖都係「made in HK」，佢嘅生產基地就喺香港大埔工業村。