今年2月，第一次有人講港股「大時代2.0」。當時恒指的確頗有氣勢，不過要斷定為大時代，言之過早。港股隨即唞咗2個月做整固，5月份先開始吹起大時代嘅前奏。
正所謂休息係為咗行更遠嘅路，港股大漲小回，慢慢升到26700點，已正式進入「大時代2.0」，不過對比2015年的大時代，今次明顯係慢牛。接下來，要坐穩啦，「大時代2.0」首部曲正式開始。
首先，嚟到7月下旬，大公司開始出中期業績，資金會搵盈喜股同業績股炒一轉。近日舜宇（2382）一發盈喜，三日累飆近三成，重汽（3808）噚日爆升26%都係同一道理。去到8月底會有幾十隻股份放榜，輪流炒都夠炒一個月，其中有12隻藍籌，到時將恒指推上27000點應該唔難。
第二部曲就係，等北水湧入再追中資金融股。早前內銀內險升過一輪，現正整固。多隻重磅科網股已經創新高，而大部份內銀股唔好話創新高，一年高位都未升穿，所以尚有上升空間。一切順利嘅話，最後三部曲就會出現，散戶衝入瘋炒細價股，到時亦都係差唔多散水嘅時候。
風吹知
http://www.fb.com/windknows/
本欄逢周五刊出