電子遊戲《NBA 2K》每年都會出新版，一班NBA球員都會好緊張自己喺遊戲入面嘅能力值有幾高。《2K18》近日就喺ig宣佈幾位球員嘅能力值，當中包括封面人物K艾榮（Kyrie Irving）、保羅佐治（Paul George）、迪洛桑（DeMar DeRozan）、D卜克（Devin Booker）、艾比迪（Joel Embiid）同唐斯（Karl-Anthony Towns），不過佢哋似乎個個都高估咗自己！
騎士控衞K艾榮覺得自己係封面人物，咁能力值點都會有95啦，點知佢知道自己得90之後，就即刻O晒嘴，之後就話呢個能力值會成為自己新球季嘅能力。保羅佐治（Paul George）能力值係91，而迪洛桑（DeMar DeRozan）同D卜克（Devin Booker）就分別係89同86。
至於一向寸寸貢嘅76人中鋒艾比迪，一開始就話：「我覺得大家好難評估我上季嘅表現，因為我覺得自己喺場上乜都做到。我係聯盟入面防守最好嘅球員，又射到三分、控球同組織都難我唔到。老實說，我至少值95分。」當艾比迪知道自己得86分時，即時嬲到不得了。唯一一個冇高估自己嘅球員，就係木狼中鋒唐斯，佢本身估自己嘅能力值有90，但得悉自己有91後，佢就講笑話：「我要話畀Joel知，我都相信過程（trust the process）㗎。」