環境局局長黃錦星噚日同傳媒茶敍，大家都好關心副局長係邊個，星星局長坦言有心水人選，但係咪外界盛傳嚟自公務員嘅人選？佢就避答，淨係話人選最重要實幹！
由梁班子過渡林鄭班子，八方問跟林鄭係咪好chur？星星聽到呆一呆，靜咗5、6秒竟然叫記者「飲茶」，跟住自己都飲咗一啖㗎。佢最後都補答番，話梁振英同林鄭一樣咁勤力喎，又話自己都好chur㗎。
上屆梁班子力推開發郊野公園，今屆新政府點睇呢？星星就話環境局唔應該只睇自己嘅政策局範疇，又舉例以前政府為興建大欖公路，都剔出咗一部份郊野公園，之後都有補償。如果要郁郊野公園，都要過到環境影響評估、郊野公園條例，而未來新增紅花嶺郊野公園，肯定郊野公園質同量都會增加。