Hello Kitty真係多粉絲兼有市場，之前一田搵呢隻無嘴貓合作，最近輪到大新銀行（2356）推Hello Kitty信用卡。銀行今次仲推出Hello Kitty主題車租用服務，認真花樣百出。
不過，銀行產品部總經理及主管鄧子健指，架車唔係佢哋收費，而係由租車服務公司管理。照咁講，涉及嘅保險、損毀問題，都係由租車公司處理嘅，卡主要留意番嘞。
銀行亦搵人做Hello Kitty，下月去指定分行做親善。至於點解咁多卡通公仔唔揀，係要揀用Hello Kitty，鄧子健解釋，因為之前同佢合作開，而且公司好多同事都鍾意Hello Kitty。