梁振英落台、林鄭月娥上場，CY昔日提出令人譁然嘅觀點同建議，官場終於可以撥亂反正。
唔知大家仲記唔記得，CY喺2016年《施政報告》提出釣魚區試驗計劃，並打算喺中環、青衣及大埔設釣魚區。政務司司長張建宗噚日同傳媒茶敍時，就疑似暗寸CY呢個諗法，不諱言話其實維港根本連魚都唔多條。
張建宗話，港人係香港嘅寶貴資源，冇第二樣東西能取替，以維港為例，「個維多利亞港魚都唔多條，係咪？你諗吓釣魚，釣來釣去，都釣唔到魚乜滯啦，泥鯭都係唔多」。
張建宗又話喎，新一屆政府要刻意做好行政與立法關係、同市民溝通要零距離，亦會好好改善政府與傳媒之間嘅關係，唔會「口惠而實不至」，言下之意，唔通係話上屆政府得把口，搞到政府同各方嘅關係都好差？