香港U22前日喺平壤舉行嘅U23亞錦賽嘅G組外圍賽同北韓踢成1:1，能夠作客和到同組實力最強嘅對手，就肯定提升到球員今日兩點半對老撾嘅信心同士氣，不過，港隊向來唔擅攻，要贏波搶三分唔係講咁易。
港U22前日被一致睇淡下挑戰北韓，早段由中場胡晉銘先開紀錄，到下半場中段就輸個罰球被扳平，港隊教練金判坤賽後話球員喺場上展示出香港人嘅拼搏精神，值得港人以佢哋嘅表現為榮；中場陳俊樂賽後話踢出部署，可惜頂唔住個罰球導致失波，而球員拼搏到最後拎到一分都好開心，今日對老撾就要諗方法入多兩球，以改善得失球。
隊長劉學銘噚日話對北韓搏得幾盡，唔少球員抽筋，賽後已經立即浸冷熱水放鬆，噚日要繼續做恢復，而佢仲話首戰和到北韓確實燃起出線、甚至首名嘅希望喎。
U15賽和中國有驚喜
賽前冇乜人關注嘅小港腳和到北韓確實係驚喜，但距離出線仲遠，而港隊早前喺緬甸四角賽入一球贏過柬埔寨咁大把，而老撾靠罰球入到中華台北三粒，個人技術唔差，港小將真係要小心應付。
另外，港U15喺澳門打緊嘅兩岸四地邀賽，首戰對中國喺兩度落後追成2:2，認真唔錯。