如果以下呢條方程式成立嘅話，魔迷們有福了：X+拉奧拿=曼聯。法甲巴黎聖日耳門（PSG）中場馬高華拉堤周三喺社交網站宣佈，同經理人迪甘比利（Donato Di Campli）分道揚鑣，並改聘拉奧拿為經理人：「我喺呢度聲明，唯一可以依法代表本人利益嘅人係拉奧拿，即時生效。我亦感謝迪甘比利至今付出嘅一切，令我擁有革新而不變嘅信念。」呢位24歲中場今夏備受巴塞隆拿垂青，但一直未獲放人，迪甘比利曾經作出PSG「囚禁」華拉堤嘅指控，最終以球員本人拍片道歉並公開宣稱願意留隊暫告一段落；不過，有法國傳媒聲稱華拉堤只係「被道歉」，亦未知事件係咪同華拉堤換經理人有關。
講咗咁耐，關曼聯咩事？皆因拉奧拿近兩季好似曼聯轉會「外判商」咁，伊巴謙莫域、保羅普巴同盧卡古等大客先後入「魔」，更有指拉奧拿出口術阻「新魔獸」重返車仔！曼聯亦樂得支付較高佣金畀呢位超級經理人，其中普巴呢單交易更驚動國際足協介入調查。
既然領隊摩連奴講明新兵未夠數，包括中場一環盛傳睇中尼曼查馬迪，不如而家近水樓台簽埋華拉堤？不過，亦有輿論認為華拉堤只係想搵個更具牙力嘅經理人促成入「塞」，或者好似AC米蘭門將基安盧基當拿隆馬一樣，搞完大龍鳳有得勁加人工。