今年財政預算案話明要推廣電競，各界當然響應，香港電競總會新會所Versus Stadium喺荔枝角開張大吉，呢間係亞洲首間以電競為主題嘅酒吧，希望成為電競分子聚腳地，噚日舉行開幕禮，由於副會長係青聯副主席楊全盛，一班青聯兄弟包括霍啟剛、郭永亮及許華傑都有撐場，許華傑直情帶埋9歲囝囝現身，原來兩仔爺平時打機當親子活動。
創科局局長楊偉雄及政府資訊科技總監楊德斌亦現身主禮；前政助梁淑寶返老巢科瑉有限公司，八方問楊偉雄搵到新政助未？佢就話仲搵緊喎。一班男士講起電競眉飛色舞，楊全盛話由細到大都鍾意打機，試過入機鋪打機俾阿媽掹住耳仔秤出去，好鬼瘀；啟剛就自言讀書時會打機、玩槍game同即時戰略遊戲，但未至於沉迷嗰隻。