特首林鄭月娥落令司局長要同市民connect，落區只係第一波，稍後仲要走訪區議會，據聞指明唔可以少過一粒鐘，少啲心力都未必頂得順。財經事務及庫務局局長劉怡翔噚日上任後首度到訪南區，除咗探區內長者同有需要家庭派回歸禮物包，仲去咗海味雜貨舖好認真咁睇乜「膠」。
話說佢由香港仔海旁坐街渡去鴨脷洲大街後到訪海味雜貨舖，了解店主喺港鐵南港島線通車後嘅經營環境，其間有店員攞住花膠，向局長細心解釋點分公乸，劉怡翔凝神貫注咁聽講，唔知對「膠」有冇加深了解？佢其後又到訪一間傳統麵包舖，仲買咗一打蛋撻畀同事醫肚。有傳媒問佢自由黨中西區區議員陳浩濂係咪出任該局副局長？佢冇直接評論，只係話副局長嘅任命仍喺程序處理中。