相對於「童言無忌」，港爸港媽竟然更愛仔女「口甜舌滑」？教育大學做咗一項旨在了解香港幼兒情緒表達、控制等能力嘅研究，揭示部份港爸港媽甚至幼稚園教師想小朋友做「交際花」，負責研究嘅學者透露，有參加聚焦小組嘅家長認為口甜舌滑係高社交能力表現，更有港媽舉例話囡囡曾喺探望婆婆時話「好掛住你」，但拎轉頭就問媽咪「幾時走得？」，呢位媽咪認為此舉反映囡囡懂得分寸兼識得𠱁人開心喎。
教大學者：未必有利家教
教育大學進行緊178項研究項目，其中一個研究項目為「3Es情（情緒）+社（社交能力）同行計劃」，兩年前展開，分四階段進行，首先喺聚焦小組了解家長、教師對幼兒情緒嘅睇法，其後由團隊開發一套評估幼兒情緒能力嘅工具，之後連續兩年追蹤相關家長、幼兒及教師嘅反應，開發一套啱香港環境嘅家教模式、教學方法。研究正處於最後階段初期，開學後會喺10間幼稚園試行教學方法。
研究由幼兒教育學系講座教授鍾杰華、副教授林俊彬負責，林俊彬同八方分享研究初步發現，話唔少家長、教師認為口甜舌滑同「見人講人話，見鬼講鬼話」嘅細路等同具有良好社交能力，諗法同西方學說較為提倡小朋友直抒己見、講求誠實明顯唔同，唔少家長仲希望小朋友成為「交際花」，或責怪喺外人前表現沉默、唔講嘢嘅仔女。
林俊彬認為喺華人社會，以上諗法屬人之常情，研究團隊唔係想苛責家長，但希望家長明白呢種諗法未必有利家教，「唔單止小朋友，大人都有人內向、有人外向，家長應該明白部份小朋友慢熱，鍾意慢慢觀察咗先」。
李八方